Ытыктабыллаах Матвей Николаевич!
Эйигин 60 сааскын туолар кэрэ-бэлиэ күҥҥүнэн итиитик-истиҥник эҕэрдэлиибин.
Эн биирдэ талан ылбыт хайа инженера курдук уустук идэҕинэн араас дуоһунастарга сир анныгар шахтертан саҕалаан республикабыт саамай улахан промышленнай тэрилтэлэрин биллэр-көстөр, убаастанар салайааччытыгар тиийэ үүнэн-сайдан кэллиҥ. Ханнык да тэрилтэҕэ үлэлии сылдьыбытыҥ иһин эн салайааччы быһыытынан үрдүк билиилээххин, улахан ирдэбиллээххин, сатабыллааххын, үлэҕит үтүө түмүктэрдээх буоларын туһугар, хас биирдии үлэһитиҥ сайдан иһэрин, кинилэр олорор-үлэлиир усулуобуйалара тупса турарын туһугар үгүс сыраҕын уураргын астына бэлиэтииллэр. Республикабытыгар алмаас, көмүс, атын да сиртэн хостуур промышленноһыгар олохтоох саха ыччата үлэлии кэлэригэр эн 1997 сыллаахха бэйэҥ сүүрэн-көтөн тэрийбит «Анаабыр алмаастара» тэрилтэҕэ саҕалаабыт үлэҥ олук уурбута. Ол түмүгэр олохтоох ыччаттар республикабыт уонунан промышленнай тэрилтэлэригэр араас идэлэргэ ситиһиилээхтик үлэлии сылдьаллара туоһулуур.
2001 сыллаахха республикабыт президенин уонна вице-президенин быыбарыгар В.А. Штыров уонна мин кандидатурабын күүскэ өйөөбүккэр улахан махталлаахпыт. Республикаҕа ыытыллар «Азия оҕолоро» Бүтүн аан дойдутааҕы спортивнай оонньуулар тэрээһиннэригэр хас сырыы аайы сүрүн спонсор быһыытынан көмөҥ түмүгэ – ыччаппыт эт-хаан өттүнэн сайдыыта, кинилэр Россия, Аан дойду таһымнарыгар, олимпийскай оонньууларга ситиһиилэрэ буолар.
2006 сыллаахха төрүттэрбит үйэлэртэн илдьэ кэлбит олоҥхолоро киһи аймах тылынан уус-уран аймньытын саамай үрдүк чыпчаала буолан ЮНЕСКО биһирэбилин ылыытыгар эн тус көмөҕүн сахаҥ норуота умнуо суоҕа. Оттон төрөөбүт Түбэйгэр, Сунтаар уонна республикабыт элбэх улуустарыгар эн туттарбыт араас социальнай, производственнай о.д.а. эбийиэктэриҥ норуоппут инники сайдарыгар сүҥкэн суолталаахтар.
Өбүгэлэрбит саҕаттан сөбүлээн илдьэ кэлбит маспыт тардыһыыта Аан дойду таһымыгар тахсыытыгар, Норуоттар икки ардыларынааҕы олимпийскай кэмитиэт, Азия олимпийскай сэбиэтин өйөбүллэрин ситиһиибитигэр, араас таһымнаах күрэхтэһиилэри ыытыыбытыгар эн сүрүн спонсор буоларгынан махталбыт муҥура суох уонна салҕыы да бииргэ үлэлиэхпит диэн эрэнэбит.
Убаастабыллаах Матвей Николаевич, бүгүҥҥү дьоро күҥҥэр дьолу-соргуну, өссө үрдүк ситиһиилэри, кытаанах доруобуйаны баҕарабын. Республикаҥ, норуотуҥ туһугар ыытар сүҥкэн үлэҥ үтүө түмүктэрдээх буола турдун! Уруй тускул, нөрүөн-нөргүй буоллун
Эҕэрдэни кытары
Специальный представитель Главы Республики Саха (Якутия) по Арктике
А.К. Акимов
Алтынньы 26 күнэ 2024 с.
